فأيام الروضة..وقبل لا اركب الباص ..كانت امي تودعني بالاحضان والدموع (تتحراني رايحة الغوص) مب يعني الروضة في آخر الشعبية!!..وبين توصياتها كانت تقول لي يابنتي ترا فلوسج بتلقينهن في المحفظة الصغيرة وحطيت لج اكل داخل “طبقة اليهال” يعني شنطة الاكل..بس يابنتي هاا تحذري تلعبين عريس وعروسة!!
وكبرت..ودخلت الابتدائية..وامي على نفس الموال..كل صبح احضان ودموع وتوصيات من امي لأختي..هالله الله بأختج…ترا البيزات عندج اشتريلها من المقصف ولا تخلينها اتداعص البنات والا بيعفصونها..ولا تخلينها تلعب عريس وعروسة!! دخلت الاعدادية والثانوية وتغير الموال شوي..كنت ايي احب امي على راسها وانا دموع واحضان واقولها..فديتج اماية مابى اداوم تعبانة واتجلب جدامها اللي يشوفني بيقول هذي امراض الدنيا فيها بس عشان ما اداوم واجابل الابلة الفلانية اللي دوم اتضارب معاها..مع ذلك امي فاهمتني فديتها وتقول توكلي على الله وعن البزا…بس اياني واياج تلعبين عريس وعروسة!!
وفي يوم من من ايام الثانوية…كانت عندنا حصة فراغ..وياكثرهن حصص الفراغ..فقررنا نكسر روتين الدراسة ونمثل يعني عندنا مواهب بالهبل وقررنا نستغلها…فلبسني البنات شرشف الطاولة..ودقن الباب والطاولات على نغمات جميلة ويلسن ايببن “يزغردن بالمصري” وقامت اللي تعرف تغني تلعلع بصوتها الجميل..وانا بحكم اني عروس سويت عمري مستحية واطالع الباب “انتظر المعرس”…لكن حدث مالم يحمد عقباه..دخلت علينا مربية الصف وهات هزاب وغسل شراع وان اصواتنا واصلة لين الادارة (صفنا مجابل الادارة بالضبط يعني قواة عين فينا مب طبيعية خخ )…وزختني انا بالذات على ينب وقالت بضحك تلعبين عريس وعروسة !! انا هني انجلطت..ولحزن!! هذي لعبة عريس وعروسة اللي كانت امي تحذرني منها..لعبة عريس وعروسة هي شرشف الطاولة !!وافضيحتها..واشرفاه..وا امااه…وا ظهري اللي بيتقطع عليك واير التلفزيون..من الصدمة والصياح انغمى علي..وانا ارتجف ومابغي انش”مسوية عمري ميتة” يعني افضل وسيلة للهجوم هي الهرب ..والابلة تهديني ولاتعرف شو السالفة وانا شالة المدرسة بالبغيم…واقولها دخيلج لاتخبرين امي دخيلج..وشوي بحب ريولها والكل يطالعني ومستغرب بلاها البنت؟؟!! رجعت البيت ومليون خاطر وخاطر اييني…اشرد؟ والا اعترف بجريمتي!! وامي شو ذنبها اعذبها؟! الله يغربل اسوم هي اللي لبستني الشرشف لو مالبستني ياه محد بيدل اني عروس!! ياربي شو اسوي..يالله اعترف واللي فيها فيها..واول ماوصلت حبيت امي على راسها”تقردين” وهي فديتها كعادتها تسألني ها بنيتي شو سويتي في المدرسة وانا من الزيغة اتحراها حد وصلها الخبر!! جذبت عليها وقلت لها ماشي والله ماسويت شي”يعني اللي مايشك بخليه يشك فيني اني مسوية شي” وتميت اصيح واركض عالغرفة…شافتني اختي وخبرتها السالفة وقلت لها كل شي عشان ع الاقل ضميري يرتاح..الغريب ان اختي تمت تضحك وتضحك وماقدرت تسكت..وانا اطالعها ياربي شو هالبرود انا اصيح وهي تضحك..فجاة سكتت وقالت فديتج يالبريئة تتحرين هذي لعبة عريس وعروسة؟؟ احسن لج اتمين على برائتج ولا تطلعين ع العالم..
ويوم طلعت ع العالم..شفت الويل والعجب العجاب وهم يبكي وهم يضحك…شفت وسمعت وعرفت ان لعبة عريس وعروسة من المحظورات والمشكلة عيالنا صغار يتعلمونها من الكبار…صرنا مانعرف نخاف عالبنت اكثر والا الولد!! على اليهال او الكبار!! نشك بكل حد ونخاف اكثر وان الدنيا تغيرت ومالها امان وان محد من البنات صارت تحط شرشف الطاولة على راسها..وصار كل شخص يطلع من البيت نحذره بخوف وتهديد :ها تحذر تلعب عريس وعروسة!!
من مدونة عفراء الكتبي
منقول
miss.green
عدد الرسائل : 53 العمر : 28 الموقع : ниαĸ .. в3eed تاريخ التسجيل : 14/02/2009
موضوع: هااا..تحذري تلعبين عريس وعروسة 
الأربعاء مارس 11, 2009 9:33 pm
